Молитва ко Господу
по случаю 940-летия града Минска

Господи Боже Вседержителю, Словом Твоим утвердивый небеса и Духом уст Твоих всю силу их.

Призри на град наш Минск и благослови его, обнови и умножи милости Твоя на людех, живущих в нем.

Низпосли, Господи, мир Твой на предержащие власти страны нашея и на всех живущих и трудящихся в ней.

Не предаждь нас служити суете и неправде, но да призрим на вся заповеди Твоя и потщимся ко исполнению их.

Даруй нам благодать и ревность о имени Твоем и о правде Твоей, и вся ко временному житию потребная,

предстательством и покровом Пречистыя и Преблагословенныя Владычицы нашея Богородицы и Приснодевы Марии, молитвами святых, в земле Белорустей просиявших: Святителей Симеона, Мины и Дионисия Полоцких, Кирилла и Лаврентия Туровских, Георгия Могилевского, преподобномучеников Афанасия Брестского и Серафима Жировицкого, преподобных Евфросинии Полоцкия и Манефы Гомельския, святых праведных Иоанна Кормянского, Софии Слуцкия, Иулиании Ольшанския, блаженныя Валентины Минския, святых новомучеников и исповедников Земли нашея и всех святых Твоих, с ними же вкупе Тебе славу, благодарение и поклонение возсылаем Безначальному Отцу со Единородным Твоим Сыном и Всесвятым и Благим и Животворящим Твоим Духом ныне и присно и во веки веков. Аминь.