Стихиры на «Господи, воззвах», глас 4-й:

Священномученици земли Белорусския,/ предстоя престолу Святыя Троицы,/ всегда молите за нас, на земли сущих,/ ревностно сохраняти заповеди Божия/ и терпение стяжевати во всех обстояниих/ и любовь нелицемерну обрести,// моля о спасении душ наших.

Пастырьми добрыми служивше на земли,/ мудре окормляли есте словесных овец,/ веру утверждали есте Православную,/ нищия одевали есте, страждущия врачевали есте, голодныя питали есте,/ закон Божия любве пастыря ко овцам соблюли есте,// умолите спастися душам нашим.

Пастыреначальнику нашему подобяся,/ искренне служили есте ближним,/ страждущия окормляли есте,/ веру истинную яко щит сохраняли есте/ и неувядаемый венец бессмертия обрели есте,// молите о спасении душ наших.

Слава и ныне... Догматик, глас 4-й

Чтения 3, мученический.

Стихиры на литии. Стихира храма, таже святых, глас 1-й:

Первии исповедници страны нашея,/ кровьми своими землю обагривше,/ ныне предстоя пред Престолом Божиим,// выну молите спастися душам нашим.

Слава и ныне. Богородичен.

Стихиры на стиховне, глас 5-й:

Священномученици нашея земли,/ веру обретше и добре сохранивше,/ в терпениих, бедах и напастех яко столпи непоколебимии устоясте,/ образ верным преподасте,/ молите о нас веру непоколеблему соблюсти// и спастися душам нашим.

Стих: Священници Твои облекутся в правду и преподобнии Твои возрадуются.

Имуще молитвенников необоримых,/ молим вас недостойнии/ жизнь нашу умирити,/ терпение и любовь к ближним стяжати/ и спастися душам нашим.

Стих: Воспойте Господеви песнь нову.

Кровьми вашими земля наша напитася/ и яко семя благоплодовитое/ возрасти сыны и дщери благонравия,/ иже веру Православную укрепиша,/ храмы и обители воздвигоша/ и свет истины в крае нашем озариша.

Слава и ныне. Богородичен, глас 5-й воскресный.

Тропарь глас 4-й:

Боже отец наших,/ творяй присно с нами по Твоей кротости,/ не отстави милость Твою от нас,/ но молитвами их в мире управи живот наш.

Слава, и ныне. Богородичен воскресный.

На утрени.

На Бог Господь, тропарь тойже.

По 1-й кафизме седален, глас 4-й

Возсияли якоже солнца заря/ и блистали, новомученици, всему миру светло/ деянии и учении вашими, светоноснии.

Слава и ныне, Богородичен:

Пречистеи руце Свои, Дево Мати, простерши,/ покрый уповающия на Тя и Сыну Твоему зовущия:/ всем подаждь, Христе, милости Твоя.

По 2-й кафизме седален, глас 5-й.

Апостольским вещанием огласивше свой ум, жертву чисту принесли есте Царю и Творцу, воплощщемуся за ны от Девы Богородицы, и воскресшему со славою: Егоже пред мучители исповедаше, священномученици.

Слава и ныне. Богородичен:

Тебе имею Заступницу, Пречистая,/ не убоюся николиже от враг на мя возстания, яко Бога рождши милостиваго/ покрый мя милостию Своею,/ ибо к Твоему заступлению присно прибегаю.

Величание

Величаем Вас, святии новомученици и исповедници земли нашея,/ и чтим святую память вашу:/ вы бо молите за нас Христа Бога нашего.

Псалом избранный:

Услышите сия, вси языци:

По полиелеи седален, глас 1-й:

Честную твердь церковную яко звезды величайшия просвещаете присно, и верныя озаряете, мученици божественни, Христови воини.

Степенна, 1-й антифон 4-го гласа

Прокимен:    Честна    пред    Господем    смерть преподобных Его:

Стих: Что воздам Господеви о всех, яже воздаде ми.

Всякое дыхание:

Ев. от Луки, зачало 67.

По 50-м псалме стихира, глас 1-й, писана на литии.

Канон Богородицы молебный, глас 8, и новомучеником.

Песнь 1.

Закон Божий зело возлюбив, добре его преподал слепым детем, укрепляя в них дух бодрости и смирения, отче Владимире, моли и за нас, да в терпении пронести все напасти мира сего.

Истины веры Православныя даяй учеником духовныя школы, яко знамя победное пронесл еси я чрез житие свое, священномучениче Василие.

Прияв священный сан в годину тяжких испытаний, и зань от гонителей смерть, яко Иов мудре устоял еси во искушении, отче Петре, священномучениче.

Богородичен:

Милостиву верным и благоуветливу быти,/ Богомати, умоли Слова,/ Егоже родила еси телесно, к нам пришедшаго:/ Тя бо Предстательницу и спасение стяжахом.

Песнь 3-я:

В вере укрепляя паству свою, отче Валериане, заповеди Христовы соблюл еси даже до смерти.

Без боязни стал еси на защиту веры Православныя, священномучениче Владимире, не убоявыйся сильных мира сего, глаголал еси истину Божию даже до крове.

Искренне служа Богу, священномучениче Иоанне, веру соблюл еси, неповинно прияв смерть от нечестивых.

Богородичен:

Песньми Пресвятую, вернии, Марию похвалим,/ Богоматерь обрадованную,/ покров Божественный, тихое пристанище,/ всех верных Предстательницу.

Седален, глас 3-й:

Миром помазания освятившеся, пастырие, явистеся людем богомудрым, и яко агнцы чистии, пожершеся, принесостеся Слову Началопастырю, пожершемуся яко овча, мученици всехвальнии, и светильници всемирнии.

Темже торжествуем вси любовию Божественную память вашу.

Песнь 4-я:

Неленостно служа Господеви, ревностно окормлял еси паству свою, отче Сергие, и мученически почил еси в Бозе.

Видя врага лютаго, ополчившагося на Церковь Православную, истово призывал еси свою паству к покаянию и обрел еси покой в чертозех небесных.

Подобяся мученику Лукиану, изранен от иудея, свою последнюю Божественную литургию совершил еси, лежай у Престола, в Светлое Христово Воскресение и обрел еси покой в Царствии Небеснем, священномучениче Михаиле.

Богородичен:

Умерщвлена мя древле, к жизни, Пречистая, паки возвела еси,/ едина Ипостасную Жизнь рождшая,/ Ейже приразившися, расторжеся яве враждебнейшая смерть.

Песнь 5-я:

Подобяся пастырю доброму, положил еси душу свою за овцы пажити своея, отче Порфирие, моли о нас Господа славы, дабы мы твердо сохраняли веру Православную во вся дни жизни нашея.

Ангельским чином облекийся, не убоялся еси обличити безбожную власть, отче диаконе Николае, темже сном праведным уснув, убиен был еси.

С молитвою на устех приял еси смерть от безбожных, отче Михаиле, ревностно служа Богу и ближним, и мирно упокоился еси с праведными на лоне Авраамле.

Богородичен:

Возсияла еси, Богомати, яко утро,/ Солнце незаходимое, соединенное плотию, по Ипостаси/ на руку носящи, Истинныя Правды,/ тем Тя вси прославляем.

Песнь 6-я:

Смело и решительно пред всеми людьми исповедав веру во Христа Иисуса, мученически почил еси в Бозе, священномучениче Николае.

Ревностно служа на слуцких землях, призывал еси небоязненно исповедати веру во Спасителя, мужественно встретил еси смерть, отче Иоанне.

Верно служа Богу на минских и тверских землях, кровию своею запечатлел еси пастырское служение, священномучениче Димитрие.

Богородичен:

Душ очищение и спасения Ходатаица еси/ верою Тя и любовию Божию Матерь возвещающим и Сыну Твоему согласно зовущим:/ благословен еси, Боже отец наших.

Кондак, глас 8-й

Истины свидетелие и благочестия проповедници, возсияли бо есте сущим во тьме неразумия, и подвиг мученический совершивше, поминайте нас сущих на земли у Престола Божия славы.

Песнь 7-я:

Духовно окормляя измученныя войною люди и воины, несл еси живое, вдохновенное слово пастыря Церкве Христовы и мученически пострадал еси за веру, отче Иоанне.

Претерпевая страдания, не отреклся еси от веры Христовы, отче Леониде, сохранив верность Господеви даже до смерти.

Заботлив пастырь и усерден молитвенник явился еси, отче Александре, и за веру Христову убиен бысть.

Богородичен:

Моли присно Сына Твоего и Бога нашего,/ Неискусобрачная Марие Чистая,/ низпослати нам верным милость.

Песнь 8-я:

Мужественно сохраняя веру православную, истово окормляя паству свою, священномучениче Владимире, совесть сохранил еси целу и неврежденну и приял еси смерть от безбожных.

В житиях святых навыкл еси ревности Божией, отче Димитрие, еюже возшел еси в селения райская.

Духовно окормляя копыльскую землю, претерпе поругания и насмешки, веру соблюл еси, не убоявыйся мучителей беззаконных.

Богородичен:

Безсеменно зачала еси, Богоневесто, Спаса и Господа,/ избавляющаго ны от тли,/ Тя воистину песнословящия.

Песнь 9-я:

Первым летописцем страданий духовенства в годы большевикскаго лихолетья явился еси, отче архимандрите Серафиме, и сам положил еси живот свой за веру и други своя.

Издетства испытав крайнюю тяготу нищеты, став пастырем, ревностно служил еси приходящим к тебе, отче Матфее, и мученически упокоился еси.

Священномученици Белорусския земли, молите Троицу Святую о нас на земли сущих, дабы и мы во всех кознех диавола и мира сего сохранили ревность о Бозе во вся дни жития нашего.

Богородичен: Бога, Егоже родила еси, Чистая Дево, Сего умоли рабом Твоим даровати согрешений прощение и противных избавление.

Светилен

Яко священномученици и исповедници вязати и решити имеяше власть, вернии явистеся пастырие, и Христову испивше чашу, благоугодисте Христу, Тому молитеся о всех нас с горними слугами, во свете ныне водворяющеся.

Богородичен:

Совета великаго Ангела Отча родила еси Христа Царя славы, препетая Отроковице, Егоже крест священномученици проповедавше, просветиша языки и научиша Тя Богородицу славити и поклонятися Твоему Рождеству.

Священномученици земли Белорусския,/ чтуще вас мы недостойнии/ просим усердно в скорбех и печалех пребывающим/ даровати нам ревность и любовь Христову/ и спасти души наша.

Слава и ныне, глас тойже:

Владычице, приими молитвы раб Твоих и избави ны от всякия нужды и печали.

На Литургии, прокимен глас 7-й:

Честна пред Господем...

Апостол к Филипписием, зач. 246.

Ев. от Луки зач. 77

Причастен: Радуйтеся праведнии о Господе...

Стихиры на хвалитех, глас 8-й:

Благодатию священства облекшеся,/ пастырьми добрыми явистеся,/ кротость и терпение стяжавше,/ любовь ко Христу сохранисте,/ священномученици земли нашея,/ молите за чада ваша,/ да в терпении и правде Божией обрящем спасение душам нашим (дважды).

Имуще пастыри неусыпныя в молитвах,/ просим вас, страдальци наша,/ укротите раздирания Церкве Христовы,/ угасите шатания языческая/ и испросите у Господа славы/ даровати земли нашей отишие,/ мир и велию милость.

Службу составил протодиакон Николай АВСИЕВИЧ