Молитва
пред Жировичской иконой Божией Матери
О Премилосердая Госпоже, Дево Богородице! Киима устнама прикоснуся ко святыни Твоей, или киими совесы исповем щедроты Твоя, людем являемыя: никтоже бо, притекаяй к Тебе, уходит тощ и неуслышан. От юности моея взысках помощи и заступления Твоего, и николиже лишен бых милосердия Твоего. Зриши, Госпоже, скорби сердца моего и язвы души моея веси. И ныне, коленопреклоненно предстоя пред пречистым Твоим образом, моления моя приношу Ти. Не лиши мя всесильнаго ходатайства Твоего в день скорби моея, и в день печали моея заступи мя. Тока слез моих не отвратися, Владычице, и радости мое сердце исполни. Прибежище и предстательство буди ми, Милостивая, и света Твоего зарями ум мой просвети. И не токмо о себе молю Тя, но и о людех, притекающих к заступлению Твоему. Церковь Сына Твоего во благости соблюди, и огради ю от злокозненных наветов враг, возстающих на ню. Архипастырем нашим посли помощь Твою во апостольстве, и сохрани их здравы, долоденствующи, право правящи слово истины Господни. Пастырем испроси у Бога Сына Твоего ревность и бдение о душах врученнаго им стада словеснаго, и дух разума и благочестия, чистоты и правды божественныя им низпосли. Испроси такожде, Владычице, у Господа властем предержащим и градоправителем мудрость и силу, судиям правду и нелицепиятие, всем же притекающим к Тебе дух целомудрия, смиренномудия, терпения и любве. Еще же молю Тя, Премилосердная, осени страну нашу кровом Твоея благостыни, и избави ю от бедствий стихийных, нашествия иноплеменников и междоусобных нестроений, да вси, живущии в ней, в любви и мире пребывающе, тихое и безмятежное житие поживут, и благ вечных молитвами Твоими унаследивше, взмогут купно с Тобою восхвалити Бога на небеси во веки.
Аминь.
|
